Piniriso sa CPDRC mipuga

CEBU, Philippines - Usa ka piniriso sa Cebu Provincial Detention and Rehabilitation Center (CPDRC) mipuga gikan sa nag- escort kaniya nga jail guard human mutambong sa hearing sa iyang kaso didto sa Regional Trial Court (RTC)   sa dakbayan sa Bogo hapit nang kaudtuhon kagahapon.

Ang maong piniriso mao si Kim Inbento nga taga barangay Lamintak Sur sa lungsod sa Medellin nga nag-atubang og kasong murder.

Si Inbento gitakda na untang dad-on pagbalik sa CPDRC sakay sa service vehicle human sa hearing dihang mihangyo kining moduaw sa iyang amahan didto sa Lamintak Sur. 

Si Inbento gi-remand sa CPDRC sa katapusang buwan sa miaging tuig.

Si JO1 Felix Betasalo, ang jail guard nga maoy nag-escort   ni Inbento nanawag dayon og suporta sa Medellin Police station apan sa gipahigayong manhunt operation wala pay report nga nadakpan og balik si Inbento hangtod sa pagsuwat ning balita.

Sumala sa kapolisan nga human sa hearing sa kaso, si Inbento mihangyo kang Betasalo nga mouli una sa ilang balay sa Lamintak Sur kay makigkita sa iyang amahan.

Apan sa ilang pag-abot didto, ang balay sa mga ginikanan ni Inbento adunay tupad nga tindahan hinungdan nga mipalit kuno kini og Coke ug mihapit kini og hikap dala ang paghapohap sa usa ka manok hiniktan.

Si Betasalo niadtong higayona giingong mikompiyansa lang usab kay pinosasan man ang duha ka kamot ni Inbento.

Unya nangihi makadiyot ang maong polis sa kilid sa balay sa mga ginikanan ni Inbento, apan pagkahuman niya og patil-is nahanaw    daw aso si Inbento kay misirit kini og dagan pahilayo sa maong lugar.

Ang suspek, dali ra unta kaayong mailhan kay nagsul-ob man kini og uniporme sa mga binilanggo nga mao ang kolor orange nga t-shirt sa CPDRC.

Ang laing mga kaubang piniriso ni Inbento nahabilin sa dakbayan sa Bogo sanglit wala pa man nahuman ang ilang hearing.

Si SPO4 Carlos Condino, team leader sa Medellin Police Station nagkanayon nga nagsakay lang og pasaheroan ang jail guard ug si Inbento paingon sa Lamintak Sur.

Matud ni Condino nga ilang gisuwayan og gukod si Inbento apan dali kining misuot sa katubhan hinungdan nga napakyas sila sa pagsikop dayon niini.

Mipahigayon usab sila og checkpoint ug nanawag sila sa mga kasikbit nga lungsod aron mohimo og checkpoint aron masikop pagbalik si Inbento kun mosakay kini og sakyanan.

Hinuon dako ang posibilidad nga mosurender pagbalik sa mga otoridad si Inbento sanglit ang uyoan niini nga si Emelio Villegas mao man ang kapitan sa Lamintak Sur ug dako ang purohan nga mao kini ang muhangyo sa maong piniriso nga motahan sa mga otoridad.