Kugi yawe sa kalamposan - Sitoy

CEBU, Philippines - Gihulagway ni 6th District Provincial Board Member Arleigh Sitoy nga ang kakugi ug work ethic maoy hinungdan nga nakapangamahan siya og duolan 200 ka resolution ug 14 ka ordinansa.Si Sitoy sa pakighinabi sa Banat News mibutyag nga wala siya magdahom nga hilabihan na diay ka daghan ang iyang napasar nga resulosyon.

“ Wa ko mag-expect nga ingon na ana diay kadaghan akong nahimo” pasabot pa ni Sitoy. Alang kaniya nga ang kakugi nga gihimo sa iyang mga staff nga mi-asister kaniya maoy hinungdan nga siya nakaumol og dul-ang 200 ka mga resulosyon. “My staff are working their best para sad matabangan ko sa akong trabaho,” butyag pa ni Sitoy. Midugang si Sitoy nga ang iyang staff kada-adlaw adunay quota nga dili mominos lima ka resulosyon ang himoon ug i-research aron ilang maduso sa board.

Napanglantawan usab ni Sitoy nga tungod sa iyang gitakda nga quota maoy hinungdan nga daghan kaayo ang trabaho sulod sa iyang buhatan tungod sa kakugihan sa iyang mga sakop. 

Gihulagway usab ni Sitoy nga usa siya ka rule oriented person diin kun adunay gitinguha nga iduso ngadto sa mga board member, iya gayud kining buhaton.

Base sa report sa record sa Provincial Secretary si Sitoy maoy nakapasar og 182 ka resolusyon ug 14 ka ordinansa, samtang gisundan usab kini ni Board Member Sergio Restauro nga adunay 65 ka resulosyon ug upat ka ordinansa, anaa usab sa ikatulo mao si Board Member Thadeo Ouano nga adunay 61 ka resolusyon ug walo ka ordinansa, samtang si Board Member Julian Daan may 61 ka resulosyon ug usa ka ordinansa ang misunod sa lista si Board Member Peter Calderon nga adunay 57 ka resolusyon ug siyam ka ordinansa. (Lesley Caminade-Vestil/WC) (BANAT)