Apektado sa demolition midangop ni Radaza

CEBU, Philippines - Mikabat sa 35 ka balay nga nahimutang sa sitio St. Joseph Village , sa barangay Marigondon, dakbayan sa Lapulapu ang gitakdang demolison.

Gumikan niini ang 35 usab ka pamilya nga maoy apektado sa maong demolisyon nagpundok kagahapon   sa barangay hall sa Marigondon aron sa pagkonsulta sa ilang kahimtang.

Matud pa ni Marigondon barangay secretary Felipe Amores nga wala na silay mahimo niini gumikan kay    mando kini base sa orden sa   “Writ of Demolition” nga giluwatan ni MTCC OIC Clerk of Court Rhodora Echavez .

Kini human sa kadugay nang panahon nga gihatagan og lugway ang maong mga molupyo sa pagpabalhin kanila sa laing dapit apan wala sila mosanong sa maong kamandoan.

 Matud pa ni Amores nga human mopasaka og petition for eviction ang Philippine State Corporation ug Pacific Rehouse nga maoy   tag-iya sa maong yuta ngadto sa MTCC sa dakbayan sa Lapulapu sa milabay’ng tulo ka tuig si MTCC Judge Wilson Ibones miluwat og kamandoan niadtong Hunyo 3, 2008 nga pabor ngadto sa mga tag-iya sa yuta.

Gumikan sa hangyo sa mga apektadong molupyo, ang tag-iya sa yuta misugot sa paghatag kanila og higayon uban sa pagtuo nga hinayhinay kining mamiya   sa maong luna apan hangtod ning panahona wala kini manghawa.

Maoy hinungdan nga napugos ang tag-iya sa yuta sa paghangyo sa korte nga ipatuman nang higpit ang mando niini pinaagi sa pinugsanay na nga pagdemolis sa mga balay sa maong mga molupyo.

Unya nahitabo ang tension tali sa demolition team ug sa mga apektadong molupyo busa   gipasabot sila ni kapitan Amores sa pagdangop kang Mayor Paz Radaza   alang sa relocation site nga ilang kabalhinan.

Kagahapon sa press conference ni Radaza iyang gidaygan ang mga molupyo nga wala siyay mahimo sa maong kaso gumikan kay gimando sa korte ang pagpapahawa kanila .

Hinuon miingon siya nga iya pang tun-an ang maong suliran pinaagi sa iyang City attorney kung unsay angayang buhaton sa mga naapektohan.

Hangtod kagahapon wala pa ipatumang hingpit ang demolition sa paghatag og laing higayon sa mga residente nga personal nilang gub-on ang ilang mga balay.

 Matud pa ni Amores nga siyam na sa mga apektado midawat na sa hinabang nga tag P3 mil ug mipasalig nga sila nay personal nga moguba sa ilang balay aron makuha nila ang ilang mga materyales   ug ikapatukod usab nila kini sa dapit nga ilang balhinan.

 Pipila na ka mga residente sa dakbayan nga apektado sa unang mga demolisyon anaa ipahimutang sa kagamhanan sa barangay Canjulao nga maoy relocation site hinungdan nga mihangyo usab ang mga residente sa Marigondon nga kahatagan sila sa local nga kagamhanan sa Lapulapu og laing dapit nga kabalhinan. (/WC) (BANAT)