Magpale ug Rama mosugat sa mga turista

CEBU, Philippines - Personal nga tagbuon ug himamaton ni Bise-Gobernador Agnes Magpale ang kinadaghanang turista ug balikbayan nga moabot ugmang adlawa sa Mactan Cebu International Airport (MCIA) aron mosaksi sa kapistahan sa Sr. Sto. Niño.

Matud pa ni Magpale nga nahinabi sa Banat News nga sulod sa 11 na ka tuig naandan na nila kining pagabuhaton uban sa kagamhanan sa dakbayan sa Sugbo.

Gani kauban ni Magpale   si Cebu City Mayor Michael Rama aron abi-abihon ang mga langyaw nga moduaw dinhi sa Sugbo.

Midugang si Magpale nga paubanon usab niya ang mga Sinulog dancer nga maoy molingaw sa mga dumuduong inig-abot nila sa tugpahanan.

Gisaysay usab sa bise  gobernador nga ang kinabag-ang grupo sa maong mga turista gikan sa Texas sa Estados Unidos diin kasagaran mga nurse apan ang uban maggikan sa nagkadaiyang kanasuran.

Nasayran nga ang mga turista nga himamaton sa bise gobernador musalmot usab sa Suroy-Suroy Sugbo nga gitakda sa kagamhanan sa lalawigan sa Sugbo sa Enero 18 – 20 ning tuiga.

Samtang gihulagway usab ni Magpale nga kasagaran karon sa mga hotel ug uban pang mga Inn hapit na ma-fully booked tungod sa pagdagsa sa mga turista nga mosaksi sa Sinulog.

Nasayran nga ang pagsugat ni Magpale sa mga turista sa MCIA usa usab sa mga programa sa usa ka pribadong kompaniya ug non-government organization (NGO) nga gitawag nga Balik Cebu Program. (BANAT NEWS)