Mananagat miambak sa dagat nalumos

CEBU, Philippines - Nalumos ang usa ka mananagat nga miambak sa dagat human mahagbong ang backpack niini didto tungod sa Sitio Pulangdaku, barangay Esperanza lungsod sa San Francisco, isla sa Camotes sa miaging gabii.

Base sa spot report nga giduso sa San Francisco Police ngadto sa Cebu Police Provincial Office (CPPO) ang biktima mao si Allan Bacatan, 54, minyo, nga taga barangay Sta. Cruz sa maong lungsod.

Subay sa inisyal nga imbistigasyon sa kapolisan sa San Francisco, nasayran nga si Bacatan nagsakay sa bangkang panagatan nga F/B Peros sa alas 7:00 sa miaging gabii samtang paingon sa lawod aron mangisda dihang kalit nga nahagbong sa dagat ang backpack niini nga gisudlan sa iyang mga personal nga gamit.

Matud sa mga kauban niyang mananagat nga milayat si Bacatan aron apson ang natagak niining backpack apan gianod kini sa kusog nga hangin ug wala na niya makuha ang bag.

Busa ila kining giitsahan og pisi aron paguniton ug maguyod pagpasakay og balik sa bangka apan tungod sa kakusog sa hangin gianod gyud kini sa sulog sa dagat.

Milanat pa og kapin tulo ka oras una mabangali sa laing grupo nga mga mananagat si Bacatan nga patay na.

Ang kapolisan padayon pa sa ilang imbistigasyon pagtino kun tinuyo ba ang pag-ambak ni Bacatan sa dagat nga maoy hinungdan sa iyang kamatayon. (BANAT NEWS)