49 na ka contingents ang nakaparehistro

CEBU, Philippines - Misaka na ngadto sa 49 ang tanang mga contingent nga magtigi alang sa Sinulog grand parade karong Domingo human kini madugangi og upat ka grupo nga miapas sa pagparehistro sa miaging hapon ug kagahapon sa buntag.

Si Dolly Delmar, ang in-charge sa registration sa Sinulog Foundation Office mibutyag sa Banat News ang labing ulahing nakaparehistro mao ang contingent sa Gothong National High School ug Smart Telecom alang sa Free Interpretation Category, ug ang Tabok National High School sa siyudad sa Mandaue sa Sinulog Based Category nga nakaparehistro kagahapon lang sa buntag.

Matud ni Delmar nga kini wala pay labot sa nagparehistro nga guest contingent, nga mao ang San Diego Dance Troupe nga gi-sponsoran sa 360 Pharmacy ug ang Latorta Festival sa lungsod sa Argao diin anha mosayaw si Gobernador Gwendolyn Garcia.

Dugang pa ni Delmar nga posibling mapun-an pa ang gidaghanon sa mga contingent karong gilugwayan hangtud karong hapon ang registration aron paghatag og higayon niadtong interesado nga mosalmot apan wala pa makaparehistro.

Miingon si Delmar nga karong adlawa na gyud ang deadline sa rehistrasyon tungod kay inig ka Biyernes ipahigayon na nila ang briefing sa tanang mga contingent alang sa pag-pinalisar sa set-up sa paghatag og numero sa usa’g-usa.

Ang breakdown sa mga contingent sukad kagahapon sa udto mao ang sa Free Interpretation nga may 26 ka contingent, Sinulog Based SB 23, Higante, 24, Puppiteers, 27 ug Float 30.

Ang Sinulog Foundation Office bukas hangtud karong alas 5:00 sa hapon pag-atiman sa mga contingent nga gustong moapas sa pagparehistro aron makasalmot sa grand parade. (BANAT NEWS)