Dispatser giapapangig pagpusil patay

CEBU, Philippines - Patay ang usa ka dispatser sa PUJ nga gipusil sa apapangig sa wala hiilhing kriminal didto sa Purok Limonsito, barangay Gun-ob, dakbayan sa Lapulapu sa miaging gabii.

Ang biktima mao si Romeo Ymbong Cosep, 45, ulitawo nga nagpuyo sa maong dapit.

Si PO1 Bregido Paca sa homicide section sa kapolisan sa maong dakbayan miingon nga naglakaw lang ang biktima gikan sa PUJ terminal sa maong dakbayan pauli sa ilang balay.

 Dihang didto na kini sa hilit nga bahin sa karsada kalit lang milanog ang boto sa armas, dayon nahagba sa yuta ang biktima.

Ang mga molupyo sa maong dapit nga nakasaksi sa hitabo maoy mitaho dayon ngadto sa kapolisan sa dakbayan.

Ang mga miresponding polis mao nay nag-ugkat    sa biktima kansang apapangig maoy nasabak sa bala ug naglunang sa kaugalingong dugo niini apan wala na nila hiabti ang criminal.

Gisuwayan pa kini og hatud ngadto sa Mandaue City Hospital pinaagi sa Emergency Rescue Unit Foudation (ERUF) diin ideklarar sa mga doktor nga patay.

Matud pa ni PO1 Paca nga nagtuo sila nga adunay gikabanging tawo ang biktima kinsa gituohang maoy mipatay niini. (WC)(BANAT NEWS)