4 sakop sa Budol Gang nadakpan

CEBU, Philippines - Upat ka mga tawong gihulagway nga banggiitan kaniadto nga mga kiriwan og kamot ang gihipos sa kapulisan human masigpati sa usa ka inilang department store nga nahimutang sa North Reclamation Area sa barangay Mabolo sa dakbayan sa Sugbu nunot sa nagkaduol nalang ang Sinulog karung Domingo.

Ang gisignit sa mga sakop sa Theft and Robbery Section (TRS) pinangulohan sa hepe niini nga si Insp. Rolando Pinili mao sila si Florencio Villamor, 68, taga C. Padilla sa barangay San Nicolas; Federico Jacalan,58, taga JM Basa St., sa barangay Pahina Central; Antonio Leong ‘alyas Jun’, 62, taga P.Del Rosario Extension sa barangay Sambag Uno, ug Josephine Navaja ‘alyas Phine, 25, taga Duljo Fatima.

Si Pinili nga nahinabi sa mga tigbalita nagkanayon nga dunay mga biktima nga mitawag sa ilang buhatan miila sa upat nga maoy mibiktima kanila.

Matud ni Pinili mga banggiitan kaniadto ang mga suspetsado tungod sa lain-laing modus operandi nga ‘budol gang’ sa mga tawong mag shopping sa mga department stores.

Ang tulo sa upat, miangkon sa ilang binuhatan kaniadto apan karun mibiya na sila tungod sa ilang pangidaron. Si Pinili nidugang nga duna silay gipanid-an karun nga grupo gikan sa laing probinsya nga mga kiriwan og kamot nga paingong mo-check-in sa usa ka pension house dinhi sa dakbayan sa Sugbu. (BANAT NEWS)