CEBU, Philippines - Usa ka tinun-an sa grade 3 sa Basak Community School ang mireklamong gilubag sa iyang maestra ang iyang dalunggan ug gikumot ang iyang walang bukton human siya nakabuak sa sulod sa ilang classroom.
Ang mga ginikanan midangop sa Tv5 aron ireklamo ang gidangatan sa ilang anak ug gustong mabalhin og laing tunghaan ang magtutudlo sa grade 3 sa Basak Community School.
Base sa resulta sa medical certificate nagpakita nga nakaangkon ang bata og duha ka ‘contusion hematoma, with blue biolet hue at upper third of left arm.’
Dihang na-interview sa News 5 ang magtutudlo (pangalan gipugngan hangtud walay pormal nga reklamong nasang-at) hugtanong mihimakak sa pasangil.
Ang maong magtutudlo miingon nga human sa exam mikaon siya apan iyang nasayran nga nag-away ang duha niya ka tinun-an apil niini ang mireklamo nga miresulta sa pagkayabo sa ilang tray nga gibutangan sa mga plato ug baso.
Sumala pa niini igo ra niyang gitapi ang bata ug dili tinuod nga iyaha kining gipasakitan.
“Kanang lagom sa bukton, daan ra na ako ganing giingnan ang amahan nga daan ra baya na sir ang lagom sa bata ha?” sumala pa sa magtutudlo.
Apan ang bata mimustra atubangan sa reporter giunsa siya sa iyang magtutudlo. “Iya kong giana,” matud pa sa bata nga milubag sa dalunggan ug miinat sa buhok duol sa iyang dunggan.
Si Elsie Colo ang prinsipal sa maong tunghaan nagkanayon nga karon pa nahitabong dunay mireklamo batok sa maong maestra.
Giklaro sa prinsipal nga gi-seminar ang tanan niyang magtutudlo nga dili mopahamtang og corporal punishment ngadto sa ilang mga tinun-an.“Usahay mapikon ang mga maestra, pero gidili gyud na (silot),” sumala pang Colo.
Dugang pa niini nga wala pa sukad nakapasakit og tinun-an ang maong magtutudlo. Hinuon siya miingon nga iyang i-reprimand ang maong maestra nga dili na usbon ang susamang paagi sa pagdisiplina.
Apan si Director Recaredo Borgonia sa Department of Education (Dep-Ed) dinhi sa rehiyon siyete nga nahinabi sa Banat News mipamandu dayon kang Dr. Rhea Mar Angtud, Schools Division Superintendent sa dakbayan sa Sugbu sa pagpahigayon og imbestigasyon kagahapong adlawa.
Matud ni Borgonia nga paabuton niya ang resulta sa imbestigasyon una pa siya mohimo og desisyon batok sa maong magtutudlo apan giklaro niyang magsubay gyud kini sa due process.
Gawas niini, giapil usab sa pagpa-imbestigar ni Borgonia ang laing magtutudlo sa maong tunghaan nga milamba sa iyang pultahan sa classroom ngadto sa reporter ug crew sa Tv5.
“Amo ra untang pasalamatan, niingon man hinuon ‘your not welcome,” matud pang Arnold Bustamante, reporter nga nahinabi sa Banat News kinsa midugang nga posibleng milaban kini ngadto sa iyang kauban.
Si Borgonia miingon nga mahimong ma-charge og conduct unbecoming ang maong magtutudlo. “Dili angay nga buhaton,” pasabot pang Borgonia. (/EIM)(BANAT NEWS)