Terror alert gilibkas

CEBU, Philippines - Gilibkas na sa mga awtoridad ang terror alert nga gipatuman sa Manila atol sa 22-oras nga prosisyon sa Itom nga Nazareno nunot sa hulgang atakihon sa mga teroristang grupo ang maong tinuig nga relihiyosong kapistahan.

Ang mismong simbahan sa Quiapo diin mag-istar ang maong imahen mikompirmar nga bisan sa wala pa modeklarar si Presidente Benigno Aquino III kabahin sa maong hulga nakadawat na sila og impormasyon kabahin niini. 

Gidayeg ni Aquino ang kapolisan ingon man ang mga kasundaluhan ug ubang mga miabag sa hugot nga seguridad sa maong selebrasyon tungod kay natapos kini nga walay bisan unsang dautang nahitabo ilabi na ang gikahadlokang pagpangatake.

Gibana-banang kapin sa tulo ka milyones ang mikuyog sa lima ka kilometros nga prosisyon nga gilibotan og 15,000 ka mga polis ug gatosang mga sundalo inabagan sa mga bomb sniffing dogs ug ang mga helicopters sa Philippine Air Force giandam aron makaresponde.

Sumala pa sa Philippine National Red Cross 500 ka mga debotos ang nakaangkon og ginagmay’ng kakulian sa panglawas sama sa pagkapaso, samad, kalapoy sa lawas ug dehydration. 

Tungod sa pahimangno ni Aquino ang mga telecommunications companies mi-jam sa ilang signal diha sa procession route isip panagang nga dili ma-trigger ang bisan unsang bomba nga mogamit sa signal sa cellphone kung duna man.

Duha ka panimalay ang gironda didto sa kaulohan nga giingong maoy gihimong kota sa mga nagplano sa pagpangatake apan walay nadakpan o bisan unsang ebidensya nga nakuha ang mga awtoridad. - AP/EIM (BANAT NEWS)