Botanding sa Oslob proteksyonan

CEBU, Philippines - Nagpalabang og ordinansa ang konseho sa lungsod sa Oslob sa higpit nga pagpatuman og balaod sa pagpanalipod sa mga whale shark kon botanding isip usa sa mga national treasure nga misanay pag-ayo sa kadagatan sa maong lungsod.

Si Mayor Ronald Guaren sa Oslob atol sa interview sa estasyonan sa Radyo nagkanayon nga ang maong ordinansa ang naaprobahan sa konseho atol sa ilang regular nga sesyon sa miaging Biyernes.

Dugang ni Guaren nga dili tinuod ang report nga adunay duha ka botanding nga samaron   sa bangkaw ug naigo sa palabad sa pumpboat.

Matud pa sa mayor nga dili kini tinuod tungod kay pagkakaron aduna silay mga lagda nga gipatuman sama sa pagdili na sa mga pumpboat nga makapaduol sa maong mga isda.

Midugang siya nga ang gitugotang makapaduol sa maong mga isda   kadto lang mga sakayan nga gigamitan og bugsay ug walay makina.

Gipasalig sa mayor nga ilang gi-protektahan ang maong mga isda nga nakapadani pag-ayo sa mga lokal ug langyaw nga  mga turista sa ilang lugar.

Samtang gibutyag sa mayor nga ang kita karon sa whale watching gibahin og katulo, diin ang 60 porsiyento niini mapunta sa mga mananagat nga nag-atiman og pakaon sa maong mga isda ug sa maintenance niini.

Samtang ang 30 porsiyento mapunta sa panudlanan sa lungsod ug ang nahabiling 10 porsiyento mapunta sa panudlanan sa barangay.

Ang mayor nagtuo nga aduna lay grupo nga gustong modaut sa ilang maayong pagdumala sa mga botanding sa kadagatan sa ilang lungsod.

Ang pamahayag ni Guaren maoy reaksyon niya sa gibalita nga luya na kaayo ang duha ka mga botanding nga nagdagan-dagan ilawom sa kadagatan tungod sa mga samad niini sa bangkaw ug sa palabad sa pumpboat.

Sa laing bahin si Gobernador Gwen Garcia nahinangop kaayong naminaw sa maong balita bahin sa mga botanding sa Oslob.

Gani gitakda niining mobiyahe ngadto sa maong lungsod aron personal niyang masud-ong ang maong mga isda.

Gawas niini gusto usab ang gobernador nga makatabang sa lungsod aron labi pang kahatagan og maayong pag-alima ang maong mga isda nga usa na usab sa mohatag og dugang atraksyon ning lalawigan sa natad sa turismo. - Darrel A. Carumba ug Chester Abadilla/WC (BANAT NEWS)