CEBU, Philippines - Namatay gyud didto sa tambalanan ang ginang nga gipusil sa miaging adlaw gumikan sa pagka-walay sticker sa iyang sakyanan didto sa Pacific Grandvilla Subdivision sa sitio Masulog, barangay Basak, dakbayan sa Lapulapu.
Si SPO1 Allan Pantaleon sa homicide section sa kapolisan sa maong dakbayan nga nahinabi sa Banat News miingon nga si Rose Ann Taneo Lapas, 39, nga nagpuyo sa maong subdivision didto makabsi sa kinabuhi sa Mactan Doctors’ Hospital sa paglabay sa pipila ka oras human kini pusila ni Randy Ymborong, hingkod, nga kolektor sa nahisgutang subdivision. Ang biktima kansang sakyanan walay sticker sa subdivision, giingong wala pasudla sa guwardiya nga nagbantay sa maong subdivision.
Hinungdan nga gikalalis niini ang suspetsado nga didto niadtong tungora sa may guard house dapit sa pultahan sa subdivision. Apan dihang nahutdan sa katarungan ang suspetsado, gisignit niini ang service shot gun sa guwardiya ug giluthang ang biktima.
Gumikan sa mga samad sa nagkalainlaing bahin sa lawas, ang biktima nabugtoan sa kinabuhi didto sa tambalanan. (BANATNEWS)