Nakalumping sa tabon sa ice cream gipusil patay

CEBU, Philippines - Patay ang usa ka ulitawo human kini dunggaba sa vendor sa ice cream kinsa nasuko nga nalumping ang tabon sa   taro sa baligyang ice cream niini kay gilingkoran sa biktima didto sa barangay Subangdaku, dakbayan sa Mandaue sa miaging gabii.

Ang biktima mao si Reynaldo Colina, 49, ulitawo nga taga dalan Hernan Cortes, sa maong barangay, samtang ang suspek mao usab si Manuel Olisiman, hingkod, minyo nga taga sitio Nawanao, sa Subangdaku gihapon.

Matud pa ni PO3 Antonio Discartin sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku nga mipalit ang biktima sa ice cream nga baligya sa suspetsado apan samtang nagtakus pa sa ice cream ang naulahi, wala tuyoa nga nalingkoran sa biktima ang tabon sa ice cream busa nalumping kini.

Maoy hinungdan nga   mihiwasa sa kasuko ang suspetsado ug bisan nangayo og pasaylo ang biktima wala na kini maminaw busa nagkalalis ang duha. 

Ang suspetsado nga nahutdan sa katarungan mipauli sa ilang balay apan mibalik kini nga nagluklok na og kutsilyo.

Pag-abot niini sa maong lugar wala nay daghang estorya gihansakan dayon sa iyang hinagiban ang dughan sa biktima. Human mahagba ang biktima sa yuta misuway og sibat ang suspetsado apan nadakpan dayon kini sa kapolisan samtang wala na makaabot nga buhi ang biktima sa Mandaue City District Hospital. (BANATNEWS)