P200 mil nga medisina para CDO ug Iligan

CEBU, Philippines - Mikabat sa dul-an P200,000 ang balor sa nagkalain-laing medisina nga gibayran sa mga cash donation sa mga donor sa The Freeman, Banat News fund drive for Mindanao, ang moabot karong adlawa sa mga dakbayan sa Cagayan de Oro ug Iligan.

Si Dr. Remedios Bacasmas sa The Freman Foundation   maoy magdala sa maong mga tambal nga anti-biotics, ointment, ug uban pa aron ikadapat dayon sa mga nabiktima  sa bagyong Sendong sa duha ka mga dakbayan kinsa nag-atubang karon sa kapeligro sa ilang panglawas gumikan sa mihugpa nga nagkalainlaing matang sa balatian sa panglawas.

Matud pa ni Bacasmas nga ang mga anti-biotics nga iyang bahinon sa duha ka mga siyudad mikantidad og P99,400   samtang ang mga ointment, mibalor usab og kaping P79,000.

Midugang si Bacasmas nga gawas sa mga gipamalit nga medisina, nga gigastohan sa mga cash donation sa nahisgutang fund drive, may dala usab siyang 100 ka vial sa anti-flu vaccine nga hinatag sa simbahan sa Sto. Niño.

Miingon si Bacasmas nga ang maong mga tambal iyang   itugyan ngadto kang Mayor Vicente Emano sa Cagayan de Oro   ug kang Mayor Cruz sa Iligan.

Si Bacasmas nga moabot karong buntag sa   Cagayan de Oro, makigtagbo dayon sa mayor ug uban pang mga opisyal sa dakbayan aron itugyan ang pahat niini sa mga tambal ug human mobiyahe na usab siya paingon ngadto sa Iligan aron sa pagdala usab sa mga tambal nga iyang igahin alang sa mga biktima sa katalagman sa maong dapit.

Sayo niini si kanhi Kongresista Jose “Dogong” Gullas kinsa maoy Chairman sa The Freeman ug Banat News maoy mihukom nga ang mga cash donation ipamalit nalang og mga medisina sanglit mao kini ang labing gikinahanglan karon sa mga nabiktima sa bagyong Sendong didto sa duha ka mga lugar sa Mindanao.

 Si Kongresista Dodong Gullas uban sa iyang kapikas sa kinabuhi Nena Gullas   maoy nagpasiugda sa maong fund drive human nila masud-ong ang hilabihan ka makaluluoy sa gidangatan sa kagatosan ka mga molupyo   sa duha ka mga dakbayan human kini masugamak sa baha dala sa kusog nga uwan sa bagyong Sendong niadtong Disyembre 18, 2011.

Base sa record sa The Freeman Foundation, mikabat na sa kaping P212 mil ang natigom nga salapi gikan sa mga malumo og kasingkasing nga mga donor niini kinsa misanong sa awhag ni Kongresista Dodong Gullas.

Samtang ang mga donasyong   pagkaon, used clothing, ug nagkalainlaing material giandam na usab karon aron ibiyahe   ngadto gihapon sa duha ka mga dakbayan karong Enero 13, 2012.

Ang pagpanawat sa mga donasyong cash ug material tak-opan karong Enero 12, 2012, sumala sa gitakda ni Kongresista Dodong Gullas. (BANATNEWS)