Mas daghang contingents karon

CEBU, Philippines - Mas daghan ang contingents nga mosalmot sa Sinulog Grand Parade karung adlaw’ng Domingo itandi sa mga nakalabay’ng katuigan.

Base sa rekord sa Sinulog Foundation sukad kagahapon sa udto miabot na og 45 ang tanang contingents apil na ang mga midaug sa bag-ohay natapos nga Sinulog sa Kabataan sa dakbayan ug Lalawigan adtong Sabado ug Domingo.

Kini wala pay labot sa laing tulo pa ka contingents dinhi sa Sugbo nga nagpahibawo nang daan nga mosalmot ug sa paghimo ning balita wala pa makapatin-aw sa buhatan sa Sinulog Foundation.

Matud ni Dolly Delmar in-charge sa registration sa Sinulog Foundation dihang nahinabi sa Banat News nga kun mohinayon ang dugang tulo ka contingents gikan dinhi sa Sugbo mahimo na unya og 48 ang tanang mangapil.

Hangtud sa alas-5 sa hapon kagahapon ang deadline sa pagparehistro sa mga mosalmot nga contingents apan gihatagan og higayon hangtud karung buntag nga makaparehistro kadtong malangay pinaagi sa pagtawag sa ilang buhatan.

Ang mosalmot gilangkoban sa 24 ka Free Interpretation Category, 21 alang sa Sinulog Based Category, samtang sa Float Category 22, Higantes 20 ug 19 alang sa puppeteers.

Samtang moabot og 12 ang tanang out of town contingents nga gipangulohan sa defending champion ug karaang contingent nga Tribu Sinanduloy sa Tangub City ug ang Tribu Placernon sa Placer, Masbate.

Pagkakaron gipatas-an ang premyo sa mananaug nga contingents diin ang tag 500 mil pesos kaniadto sa unang ganti gihimo nang usa ka milyon ka pesos.

Gipahibalo usab nga nahurot na usab ang mga Sinulog tickets nga yellow tickets nga tag P600 ug gamay nalang sab ang nahabilin sa tag 500 pesos nga pink tickets ug daghan pa ang laing tag 500 pesos nga tickets nga kolor green.

Ang white tickets niadto pang niaging semana nahurot. Subling gipahibawo ni Delmar nga diha lang sa Sinulog Foundation Office mapalit ang mga Sinulog Tickets.   - BANAT NEWS