Polis gipasanginlang nanghulga sa silingan

CEBU, Philippines - Usa ka polis kinsa nadestino sa Regional Mobile Group (RMG)-7 o Regional Public Safety Company (RPSC) gipasanginlang nanghulga sa iyang silingan nga kaduwa niya og basketball didto sa sitio Cadicay, barangay Lawaan III, dakbayan sa Talisay niadtong Sabado sa gabii.

Ang maong polis giila ni Ryan Bucao, 24, residente sa maong dapit nga si PO1 Ranel Gadiano nga maoy nanghulga kaniya.

Base sa blotter, nasayran nga sa wala pa mahitabo ang pagpanghulga si Bucao ug Gadiano magkaatbang og team sa ilang pagduwa og basketball, dihang misangpot kini sa rubo-rubo ug nagkainitay ang magkaatbang.

Didto matud pa ni Bucao,   mihiwasa si Gadiano sa kasuko   ug giingnan siya nga “unsa isog ka? Wa ka kaila nako? Unsa may gusto nimo? Di na ka katungtong diri sa Bliss (Cadicay)”.

Si Bucao nga wala motubag, nagkanayon nga nabalaka siya sa iyang kinabuhi hinungdan nga iya kining gi-report ngadto sa TCPS.

Ang hepe sa RPSC nga si S/Supt. Mariano Batiancela nagkanayon nga maghuwat siya nga moduso og pormal nga reklamo ang biktima batok kang Gadiano aron makapahigayon siya og parallel nga imbestigasyon niini.  - BANAT NEWS