NGCP motukod og transmission station sa Talisay

CEBU, Philippines - Girekomendar sa chairman sa committee on public works and infrastructure sa dakbayan sa Talisay nga si Konsehal Rodi Cabigas nga tugotan ang gisugyot nga pagtukod sa Colon-Cebu 138 KV transmission project sa National Grid Corporation of the Philippines (NGCP).

Sa committee report sa nahisgutang komitiba nagkanayon nga napanglantawan nga ang maong proyekto ang maghatag og dugang power supply sa Sugbo. Si Cabigas mibutyag nga sukad pa niadtong buwan sa Oktubre gitun-an sa iyang komitiba ang maong sugyot ug nasabutan sa maong tigom nga kinahanglang mosumitir ang NGCP og mga dokumento aron magiyahan ang komitiba o makakuha og mga impormasyon kabahin sa proyektong tukuron.

Niadtong Oktubre 27, 2011 ang NGCP miduso sa ilang mga dokumento kabahin sa proyekto ngadto sa buhatan ni Bise Mayor Alan Bucao.

Si Cabigas mipasabot nga tumong sa maong proyekto mao ang pagdawat sa 246 megawatt (MW) supply sa kuryente gikan sa Cebu Energy Development Corporation (CEDC) ug sa 200 MW gikan sa Korean Electric Power Corporation (KEPCO) ngadto sa substation sa Metro Cebu.

Si Cabigas midugang nga karong semanaha sugdan ang pagtuki sa maong sugyot.  - BANAT NEWS