CEBU, Philippines - Sa ikatulong higayon, gilangkat sa 2nd division category sa Abellana National High School ang unang pwesto sa Sinulog sa Kabataan sa Dakbayan kagahapong adlawa.
Gilangkat usab sa Abellana National High school ang best in costume diin ang ilang tema mao ang mass wedding.
Matud pa sa choreographer niini nga si Walter Betito nga wala siya magdahom nga sila gihapon ang modaog tungod kay kakuyawan sila nga mailog ang ilang kadaugan sa Apas National High School tungod sa paghangop niini sa katawhan. Ang Apas National High School maoy nakakuha sa ikaduhang ganti ug sa Best in Musicality.
Ang Barrio Luz National Night High School maoy ikatulo ug gisundan sa Don Sergio Memorial Night High School ang Ramon Duterte Memorial National School sa ikalimang pwesto.
Samtang sa elementary division, ang Bulacao Community School (BCS) maoy mibulsa sa ganting P300 mil sa unang ganti, gisundan sa Punta Princesa Elementary School, ikatulong ganti ug Best in Costume ang Zapatera Elementary School.
Ang Cebu City Central School ang ikaupat, gisundan sa Mambaling Elementary School ug ang Labangon Bliss Elementary School ang milangkat sa Best in Musicality.
Matod pa sa chairman sa mga judges nga si Larry Ogabao nagkanindot ug naka-improve ang mga presentasyon sa matag contingents.
Gibana-banang 100 mil ka tawo ang misaksi sa maong kalihukan. - BANAT NEWS