Oposisyon supak NTC sirad-an

CEBU, Philippines - Lig-on sa ilang baruganan ang mga konsehal nga oposisyon sa pagsupak sa pagpasira sa Nacario Trade Center (NTC) sa barangay Tabunok, dakbayan sa Talisay.

Sila si Danny Caballero, Romeo Villarante ug Val Ylanan mihiwasa niadtong Huwebes ug misupak sa gipasar sa konseho nga Resolution No. 2012-01 nga nag-awhag kang Mayor Socrates Fernandez sa pagpatuman sa cease and desist order sa NTC.

Apan giingnan sila sa ubang mga konsehal nga   wala silay pagpakabana sa kaayohan sa mga negosyante nga atoa sa bag-ong merkado sa Lagtang.

Matud pa ni Caballero nga nahinabi sa Banat News kagahapon nga, “nagsulbad og problema unya nag-create og laing problema”, ni Caballero pa nga nagbagulbol.

Kini tungod kay alang kaniya inigtak-op sa NTC magkaguliyang na usab ang mga vendor nga nanginabuhi sa maong merkado kay maapektohan naman usab ang ilang panginabuhi.

“Nanginabuhi ang naa sa Nacario, kung pasiradohan duna na pod unya’y magutom”, dugang ni Caballero.

Kahinumdoman nga ang NTC giplanohan nang pasiradohan sa siyudad sukad pa sa milabay’ng tuig tungod kay giingong wala kini makatuman sa gipangayo kanila sa balaod.

Apan gikwestiyon ni Caballero ang giingong paghikaw sa siyudad sa tagdumala sa NTC nga makatuman kini sa tanang requirement.

“Ipa-comply lang ang requirements, nganong di man hatagan sa city hall,” dugang ni Caballero.

Hinuon tungod kay nalig-on na ang maong resolusyon, inigpirma sa mayor niini hingpit nang sirad-an ang NTC ug wala na gyuy mahimo ang oposisyon. (BANATNEWS)