Whaleshark-watching sa Oslob i-regulate

CEBU, Philippines - Aron panalipdan gikan sa abuso ang mga whalesharks o butanding nga naila sad dinhi sa Sugbu nga ‘tuki’ giimplimentar na sugod kagahapon ang ordinansa nga mag-regulate sa whaleshark-watching sa lungsod sa Oslob.

Si Gov. Gwendolyn Garcia kinsa mi-dive kagahapon sa kadagatan sa barangay Tanawan sa Oslob aron personal nga makita ang maong mga higanteng mananap sa dagat gikatakdang makigkita sa mga opisyal sa barangay ug sa lungsod aron matuki ang pagpanalipod sa maong mga mananap gikan sa abuso.

Lakip sa pakigkitaan ni Garcia ang mga mananagat nga karon nakakita usab og laing paagi sa panginabuhian pinaagi sa mga turistang mangabot nga buot makatan-aw sa maong mga mananap.

“Aron ipahimutang ang mga lagda ug mga patakaran kabahin niining pag-protect, first and foremost, sa mga whalesharks,” matud pang Garcia. Matud pang Garcia nga gihatagan na siya ni Oslob Mayor Ronald Guarin og impormasyon kabahin sa gihimo sa munisipyo aron panalipdan ang mga tuki, sa mga turista ug sa mga mananagat.

Adunay mga mitumaw nga kabalakang sa dili madugay ang maong mga mananap molayas ug mobalhin og laing lugar kun ugaling adunay masakitan kanila o ba kaha maabusaran sa padayong pagbutho sa mga tawo diha sa ilang gilangoyan.

Ang maong mga mananap magsunod-sunod kung asa ang abundang pagkaon sama sa lumot, pino nga uwang, pinong isda, crustaceans ug uban pa.

Tungod sa nagkadaghang turista, gikinahanglang mabansay ang mga mananagat kung unsaon pag-amping ang maong mananap, unsaon pagdala sa mga turista ug uban pa.

Sa ordinansang gipatuman, planong magbutang og ticketing booth sa maong barangay ug kinahanglang ang matag mananagat makadala lang og unom ka turista, 30 porsiyento sa ilang kitaon adto mapunta sa munisipyo, 10 porsiyento usab sa barangay ug ang mahibilin ilaha na sa mga mananagat. (BANATNEWS)