Danao ug Carcar nanghakot og awards

CEBU, Philippines -  Ang mga tinun-an gikan sa Danao City Central School maoy nakaangkon sa unang pwesto sa Sinulog sa Kabataan sa Lalawigan – elementary division nga gihimo kagahapon sa Cebu City Sports Center.

Nakuha usab sa maong tunghaan ang award nga Best in Custome ug Best in Musicality.

Gisundan usab sa ikaduhang puwesto nga naangkon sa Tuyan Central School sa siyudad sa Naga. Gisakmit usab sa San Roque Elementary School sa Talisay City ang ikatulong puwesto samtang nakuha sa Bogo City Division ang ikaupat pwesto. Nagmaya usab og maayo ang Sta. Filomena Elementary School sa Alegria gumikan kay nasulod gyud sila sa ikalimang puwesto.

Samtang sa high school division, gisakmit sa Carcar City Division ang unang puwesto, samtang ang ikaduhang ganti nakuha sa Toledo City National Vocational School.

Ang ikatulong puwesto naangkon sa abtik nga mga tinun-an sa Lawaan National High School sa Talisay City, samtang ang ikaupat nga ganti nakuha sa Medillen National High School ug nabutang sa ikalimang puwesto ang Maslog National High School sa Danao City.

Nasakmit gihapon sa Carcar City Division ang best in custome ug best in musicality awards.

Ang premyo sa unang ganti nagkantidad og P300 mil , ang ikaduha P150 mil samtang ang ikatulo P100 mil, ang ikaupat P75 mil ug ang ikalima P50 mil.

Gipaabot usab karong adlawa ang Sinulog sa Kabataan sa Dakbayan nga salmotan sa mga nagkadaiyang tunghaan sa syudad sa Sugbo. (BANATNEWS)