Naimbargoha'g pusil ug kutsilyo priso

CEBU, Philippines - Gibalhug sa karsel sa Talisay City Police Station ang duha ka lalaki human sila maimbargohi og pusil ug kutsilyo atol sa gilusad nilang saturation drive didto sa sitio Mananga 2, barangay Tabunok, dakbayan sa Talisay, niadtong Huwebes sa hapon.

Ang mga suspetsado giila nga mao sila si   Roger Jimenez, 39, ug Rusalo Jenobiagon, 18, silingan ni Jimenez pulos nagpuyo sa maong dapit.

Si Jimenez   maoy nasakmitan og usa ka kalibre .357 revolver nga adunay unom ka buhing bala sa kalibre .38 nga revolver, samtang si Jenobiagon nasakmitan usab og kutsilyo nga may gitas-ong pito ka pulgada.

Si SPO1 Edgar Causon sa pakighinabi sa Banat News kagahapon mibutyag nga sayo niini nakadawat sila og report kabahin sa tawong armado didto sa Mananga 2, hinungdan nga mipahigayon sila og saturation drive.

Uban ni Causon sila si SPO1 Benjamin Sebellita, PO2 Jude Enemecio ug PO2 Jason Del Campo.

Matud ni Causon nga samtang naglakaw sila sa maong lugar nasugatan nila si Jimenez kinsa misuway og hulbot sa pusil gikan sa iyang hawak apan nagunitan dayon nila kini. Si Jimenez may kauban nga ginganlan og Alex kinsa mikaratil og dagan pagkakita niini sa mga polis.

Samtang nagpadayon sila sa ilang foot patrol sa maong lugar nasugatan usab nila si Jenobiagon, kinsa dihang ilang gikapkapan nahinolan nila ang kutsilyo niini nga giluklok sa iyang hawak.

Ang duha ka mga suspetsado gibalhog sa prisohan ug kagahapon sa buntag gitakdang pasakaan sila og tukmang kaso sa piskaliya sa siyudad. (/WC)  (BANATNEWS)