CEBU, Philippines - Gipatuman sa buhatan sa Traffic Enforcement Agency of Mandaue (TEAM) ang re-routing sa mga PUJ ug traysikol sa maong dakbayan isip dry run alang sa hingpit na nga pagbalhin sa mga manindahay gikan sa karaang merkado ngadto na sa bag-ong merkado sa sitio Tribunal sa barangay Centro ugma, Domingo.
Si Retired Police Major Edwin Ermac nga maoy executive officer sa nahisgotang buhatan mibutyag sa Banat News nga molungtad og 30 ka adlaw ang maong dry run ug kun kahimoan kini og ordinansa sa konseho mahimong ipermanente na kini.
.Si Ermac miingon nga ang mga PUJ nga nagbiyahian sa Ibabao Estancia ug Ouano Wharf sa barangay Looc adto moagi sa bag-ong merkado .
Ang mga PUJ nga nagbiyahian sa Ouano nga rota moagi sa dalan B. Ceniza, A. Soriano Avenue, W.0. Seno ug sa bag-ong merkado dayon mogawas sa dalan P. Burgos ug dalan C. Ouano ug diretso na sa pagadulngan niini.
Ang mga PUJ nga nag-rota og Ibabao Estancia gikan sa dalan A. del Rosario, adto moagi sa dalan B. Ceniza nga nahimutang sa luyo nga bahin sa karaang merkado, dayon mosubay sa dalan A. Soriano Avenue, paingon sa bag-ong merkado ug adto mogawas sa dalan P. Burgos ug molahos sa dalan Gomez dayon ngadto sa dalan S.B. Cabahug ug diretso na sa biyahian niini.
Si Ermac miingon nga dili usab maglisud ang mga mamalitay kay ang mga traysikol pabiyahion man usab ngadto sa bag-ong merkado nga mosubay sa dalan A. Soriano.
Sa laing bahin si Musulini Suliva nga maoy market administrator sa merkado publiko miingon nga gipaniguro nila nga mabakante na ang karaang merkado karong Domingo.
Kini tungod kay kalus-agon na ang maong estraktura ug dili sila gusto nga unya na mamalhin ang mga vendor kun may madisgrasya na.(/WC) (BANATNEWS)