CEBU, Philippines - Karong alas-2 sa hapon na himuon ang Sinulog Launching Parade nga buksan pinaagi sa usa ka Santos nga Misa nga ipahigayon diha sa Basilica Minore del Sto. Niño.
Sundan dayon kini sa usa ka street dancing nga manukad sa maong simbahan paingon na ngadto sa Cebu City Sports Complex ug kini langkoban sa nagkalain-laing dancers sa nagkadaiyang tunghaan sa siyudad sa Sugbo.
Ang overall chairman sa Sinulog Festival nga si Mayor Michael Rama miingon nga nakahan-ay na ang tanan alang sa nahisgutang kalihukan.
Magbaha karon ang mga sound box sa kadalanan kung diin ipatukar ang Sinulog beat. Gipahinumdoman ni Rama ang publiko nga ang kapistahan o pagtamod sa Balaang Bata maoy sentro sa kalihukan ug mas angayang hatagan og gibug-aton sa mga tawo. (BANATNEWS)