Utok sa tulis ug kawat gikasohan na

CEBU, Philippines - Gipasakaan na og kaso sa kapolisan ang duha ka suspetsadong utok sa mga tulis ug kawat dinhi sa Metro Cebu nga nasikop nila niadtong Martes sa buntag.

Kini mao ang kasong Illegal possession of firearms and ammunitions, ug paghupot og ginadiling drugas nga maoy atubangon ni Eric Reyes, 29, alias ‘Kano’ nga taga Ayala Acces Road barangay Kamputhaw ning dakbayan sa Sugbo ug ni Edward Tevez, nga taga San Vicente Village, barangay Subangdako sa dakbayan sa Mandaue.

Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon nga mao lang una kini ang ilang gipasaka nga kaso batok sa duha ka mga dinakpan kay ila pang kuhaan og mga affidavit ang ubang mga biktima sa tulis ug kawat sa dakbayan sa Sugbo ug sa Mandaue.

Kagahapon sa udto unom na ka mga complainant ang mitumaw sa buhatan sa Theft and Robbery Section (TRS).

Si Hazel nga taga Toledo City, kahera sa usa ka Spa center sa Mabolo usa sa mga mireklamo nga nabiktima nga gikawatan og bag nila ni Reyes ug Tevez niadtong Lunes

Ang sulod sa bag ni Hazel usa ka digital camera nga nagkantidad og P12 mil, card reader ug mga identification card.

Laing biktima mao ang usa ka Australian national ug asawa niining Pinay nga miadto usab kagahapon sa buntag sa TRS.

Matud sa Pinay nga wala magpaila nga niadto lang Enero 2 gikawat ang bag sa iyang bana samtang nahinanok sila og katulog sulod sa hotel duol sa ikaduhang taytayan nga nagdugtong sa Lapulapu ug Mandaue.

Niadtong Martes unang mireklamo ang tag-iya sa hotel nga nahimutang sa A.S Fortuna sa dakbayan sa Mandaue kinsa misumbong nga gikawatan sila og usa ka 32 inches flat TV.

Si Richard Cupin, tag-iya og auto shop sa barangay   Tisa, siyudad sa Sugbo mireklamo usab nga gikawat ang iyang laptop sa duha ka suspetsado.

Matud ni Buenafe nga may tag-iya sa usa ka inilang hotel dinhi sa dakbayan sa Sugbo ang nanawag kaniya kagahapon sa buntag ug mipahibawo nga biktima usab sila sa pangawat nila ni Reyes ug Tevez.

Nagtuo si Buenafe nga mas daghan pa unyang biktima nga mopatim-aw sa ilang buhatan karong pipila ka adlaw ug gipaabot nila kini aron kakuhaan og apidabit. (BANAT NEWS)