Bay sa komentarista ugdaw sa sunog

CEBU, Philippines - Nila ni Darrel A. Carumba, Romeo T. Limpangog, ug Bong Soriano Mikapin sa P2 milyones ang balor sa 16 ka balay nga naugdaw sa sunog nga mugna  sa posporo sa dakbayan sa Lapulapu ug lungsod sa San Fernando kagahapon sa buntag ug niadtong Martes sa hapon.

Sa 14 ka balay nga nasunog didto sa sitio Sangi New Road, sa dakbayan sa Lapulapu, 10 niini ang hingpit nga naabo, samtang upat ang igo lang nakan-an sa kayo nga ang tanang kadaot mikantidad og kapin P600 mil.

Samtang ang usa sa duha ka balay nga naugdaw sa barangay Pitalo, lungsod sa San Fernando niadtong Martes sa hapon gipanag-iya sa usa ka komentarista sa Radyo nga mikantidad usab og P2 milyones.

Ang mga tag-iya sa naabo nga balay sa Sangi New Road mao sila si Elvie Maranga, Ramon Teriao, Noel Teriao. Constantino Pinote, Marcial Pinote, Nelson Pinote,Ramil Cosep, Sandra Omolon, ug Tata Gonzales. Samtang ang igo lang nasilab sa kayo mao ang mga balay nila ni Grace Amor, Emetria Tuñacao, Chito Patalinghug ug Reynante Daitol. 

Didto sa Pitalo usa sa 2 ka balay nga naugdaw gipanag-iya   ni Leon Jun Juezan, komentarista sa Bantay Radyo ug sa kapikas niining si Mariani Saz, drama talent sa maong estasyon, ug sa ilang ginikanan nga sila si Anselmo ug Mercedez Saz.

Ang maong mga sunog sumala sa mga fire investigator sa duha ka mga nahisgutang lugar mugna sa mga posporo nga giduwaan sa mga bata.

Didto sa Sangi New Road, ang kayo nagsugod sa lawak sa balay ni Elvie Maranga diin ang iyang anak napasagdang nagduwa og posporo.   Ingon usab niini ang nahitabo didto sa Pitalo diin nakonpirmar nga ang pag-umangkon ni Juezan nga si Kerwin, nga gituohang natulog sa lawak sa ilang balay, nagmata diay ug nagduwa og posporo.

Si Juezan nagprograma sa Radyo dihang nasunog ang ilang balay ug kusganon niyang gibutyag nga himabaw sa P2 milyones ang balor sa iyang balay ug sa iyang ugangan uban sa mga butang sa sulod niini nga naugdaw sa maong sunog.

Kini sukwahi sa bana-bana sa kabomberohan sa ilang lungsod nga P180 mil ra, sumala ni Juezan.

Matud pa ni Juezan nga ang bugtong nahabilin sa ilang butang mao nalang ang mga senina nga gisul-ob niya   sa iyang asawa ug mga anak , ingon man sa magtiayon niyang ugangan kay napulbos gyud ang tanang mga butang sulod sa ilang balay . (BANAT NEWS)