ITAX ipatuman sa 20 ka lungsod

CEBU, Philippines - Gitakdang hingpiton na sa pagpatuman sa 20 ka mga lungsod sa lalawigan sa Sugbo ang Integrated Taxation Management System (iTax) usa ka computerization project sa probinsiya sa Sugbo sa unang hugna sa tuig 2012.

Kini ang gitug-an ni Marieto Ypil, ang Provincial Accountant ug hepe sa iTax Computerization Project sa iyang pakighinabi sa mga tigbalita.

Ang maong programa usa ka hiniusang kalihokan tali sa lalawigan sa Sugbo ug sa nasud sa Germany pinaagi sa Germany Technical Cooperation kansang tumong mao ang paghatag og hapsay ug dinalian nga paghikay sa mga papeles sa mga magbubuhis.

Pinaagi sa maong programa masayon nalang usab kaayo ang pagkuwenta sa buhisanan sa matag magbubuhis nga maoy usa sa mga paagi aron mosaka ang kinitaan sa matag lungsod ug dakbayan ning lalawigan. 

Nasayran nga ang mga lungsod sa Barili, Tabuelan, Borbon, Catmon, Cordova, ug Carmen maoy unang gipaubos sa pagbansay-bansay kalabot ning bag-ong sistema ug nagsugod na sa pagpatuman sa maong programa.

Samtang mosunod usab unya sa pagpatuman ang lungsod sa Tudela, Pilar, Sibonga, Minglanilla, Liloan, Alcantara, Santander, Bantayan, Santa Fe, Madredijos, Tuburan, Asturias, Ronda ug Medellin sa unang hugna ning tuiga.  - BANAT NEWS