Gumikan sa selos ulitawo naghikog

CEBU, Philippines - Patay ang usa ka ulitawo nga gituohang naghikog gumikan sa pangabubho pinaagi sa pagpusil sa ulo ginamit ang kalibre 38 sa sulod sa lawak sa boarding house nga gipuy-an niini sa barangay Tabok, dakbayan sa Mandaue sa miaging gabii.

Ang namatay giila nga mao si Filcris Sayon, 22, ulitawo, lumad nga taga barangay Dakit sa lungsod sa Barili ug nagtrabaho isip utility worker sa usa ka establisamento sa Tabok.

Si SPO2 Danilo Barrita sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News miingon nga napalgan sa tupad sa nagbuy-od nga patay’ng lawas ni Sayon mao ang kalibre 38 nga revolver uban usab sa kabhang nga nag-ungot pa sa tambor niini.

Dugang pa niya nga ang kauban ni Sayon sa trabaho nga si Fermin Ravalas maoy unang nakadiskobre sa patay’ng lawas sa nahauna ug siya na maoy mipahibalo sa kapolisan bahin sa maong insidente.

Matud pa ni SPO2 Barrita nga sa wala pa maghikog si Sayon nagplano pa unta kining makigkita sa iyang hinigugma nga nagtrabaho isip katabang sa panimalay nga nahimutang usab sa Tabok.

Kini tungod kay matud pa nakadawat og taho si Sayon nga may gikakuyog nga laing lalaki ang iyang uyab ug malagmit gibati kini og pangabubho. Unya dihang gitawag kuno ni Sayon ang iyang uyab kay makigsulti siya, wa gyud kuno mogawas ang naulahi hinungdan nga misurok tingale sa hilabihang kaguol ang dughan ni Sayon busa mipauli kini sa iyang gipuy-an ug puslan man, nagpusil nalang kini sa kaugalingon.

Apan matud pa ni SPO2 Barrita nga wala magbilin og suicide note si Sayon apan nagtuo ang mga otoridad nga ang pagselos maoy nagpaluyo sa iyang kamatayon.

Hinuon gisugyot nila ni SPO2 Barrita ngadto sa mga kabanay ni Sayon nga angay ipa-autopsiya ang lawas niini pagtino sa tinuod gyud nga hinungdan sa iyang pagpakamatay.  - BANAT NEWS