CEBU, Philippines - Talandugon ang kahimtang sa usa ka amahan human kini giunay og pusil sa iyang anak atol sa ilang panaglalis sa Upper Cambuntan sa barangay Bolinawan siyudad sa Carcar niadtong Martes sa alas 7:40 sa buntag.
Ang biktima mao si Demosthenes Gelinquero, nagpuyo sa maong lugar samtang ang suspek mao ang iyang anak nga si Adrian Rey Gelinquero,31.
Matud ni PO2 Renato Albuerra sa Carcar City Police dihang nahinabi sa Banat News nasuko ang biktima nga gipangayoan og kwarta sa suspek aron ipalit og lawog sa manok. Kini misangko sa ilang panaglalis ug nakapukaw sa nangagi nilang mga kasungian hangtud nga nagkasukmagay apan ang suspek mikuha og armas ug gipusil ang biktima sa bukobuko.
Ang suspek daling miikyas human sa hitabu samtang daling gihatud sa tambalanan ang biktima diha sa Carcar District Hospital. - BANAT NEWS