P.Noy ug Binay imbitado sa Sinulog

CEBU, Philippines - Imbitahon unya ni Mayor Michael Rama si Presidente Benigno Noynoy Aquino III ug Bise Presidente Jejomar Binay alang sa umaabot nga Sinulog Festival karong Enero 15.

Nagkanayon si Rama nga naandan na sa siyudad nga mangimbitar gyud og mga dagkong opisyal sa nasud ilabi na nga ang Sinulog giisip nga “King of all Festivals.”

Gipahibalo usab si Rama nga si Binay nagsugod na sa pag-arrange sa eskedyul niini busa dunay posibilidad nga mobisita kini dinhi sa Siyudad.

Gipaalerto na karon ni Rama ang Department of Public Services nga gipangulohan ni Engr. Dionisio Gualiza aron mamentinar ang kalimpiyo sa kadalanan ilabi na nga magbaha na usab ang mga bisita sa siyudad sa Sugbo gumikan sa Sinulog.

Gawas sa DPS, gimandoan na usab niya ang kapolisan nga kanunay ang paghimo og mga roving aron masiguro ang kalinaw sa siyudad ug malikayan ang mga kagubot.

Samtang nanawagan usab si Rama sa publiko nga mokooperar ug dili magpataka og labay sa basura. (BANAT NEWS)