2 sa 4 ka balay naugdaw

CEBU, Philippines - Duha ka balay ang naugdaw ug laing duha ang nakan-an sa kayo sa nahitabong sunog atol sa bag-ong tuig sa sitio Puwa, barangay San Isidro, dakbayan sa Talisay.

Ang alarma nadawat sa kabomberohan sa siyudad mga alas 4:20 sa hapon niadtong Enero 1, 2012 ug matud ni SFO2 Felipe Abarquez nakontrol ang kayo duha ka minutos gikan sa ilang pag-alarma.

Ang mga balay nga naugdaw gipanag-iya nila ni Gerondia Baclay ug Fernando Cabaral.

Samtang ang mga balay nga igo lang nakan-an sa kayo gipanag-iya nila ni Judith Manondo ug Erlinda Florendo.

Si Abarquez mibutyag sa Banat News kagahapon nga ang maong sunog naggikan sa balay ni Baclay.

Matud ni Abarquez nga ang mga silingan ni Baclay nakadungog nga adunay nagbuto-buto sa sulod sa balay niini ug dayon miulbo ang kayo.

Nasuta sa kabomberohan nga electrical short circuit ang hinungdan sa sunog nga mi-danyos og P75 mil ang tanan.

Atol sa maong sunog walay tawo sa balay ni Baclay tungod kay milakaw kini.

Walay gikataho nga naangol o namatay sa nahisgutang sunog.

Usa ka   semi-concrete ang balay ni Baclay samtang ang ubang apektado ginama sa mga gaan nga materyales. (/WC)(BANAT NEWS)