Talisay naproblema sa mga eskuwater

CEBU, Philippines - Ang kagamhanan sa dakbayan sa Talisay naproblema sa mga eskuwater nga namuyo sa daplin sa kasapaan kay dili maminaw sa mga pahimangno, matud ni Arturo Bas, Public Information Officer (PIO) sa dakbayan.

Si Bas nga nahinabi sa Banat News kagahapon nagkanayon nga ang mga opisyal sa siyudad ug kabarangayan wala magkuwang sa pagpahimangno sa maong mga eskuwater aron malikay sila sa disgrasya sa gipuy-an nilang sapa. Ang maong mga molupyo gibadlong na sa makadaghan    sa mga opisyal sa kagamhanan apan dili gyud patuo, matud pa ni Bas.

May ubang mga eskuwater nga dili pa gani makasugod pagtukod, pasidan-an na sa mga otoridad, apan inigkalipat sa mga tinugyanan sa kagamhanan mopadayon gyud sa pagtarok sa ilang balay sa tampi sa sapa. 

Matud ni Bas nga sa weekly meeting tali sa mayor ug mga department head karong buwana , Enero 2012 mohangyo siya nga ikalakip sa hisgutan ang problema bahin sa informal dweller.

Ang siyudad adunay mga relocation site sa barangay Pook, Biasong, Dumlog, Maghaway, Lawaan III ug Lagtang apan ang nahisgutang mga eskuwater dili ganahan didto kay palabihon nila ang pagpuyo sa ngabil sa sapa aron wala silay bayranan sa goberno.

Hinuon ang ubang aplikante sa relocation site di gyud madawat ilabi na kun dili kasado ang magtiayon, ug gani gumikan sa maong problema, daghan kaayo ang wala konsiderahi ni Mayor Socrates Fernandez nga makapuyo sa relocation site nga giandam sa goberno.

Gumikan sa pagpunay og uwan sa miaging tuig, nga giubanan og mga dagkong baha, mikapin sa 2,000 ka mga pamilya ang naapektohan sa maong katalagman.

Ang maong mga pamilya nanimuyo sa barangay Lawaan I ug III, Poblacion, Dumlog, Cansojong ug San Roque. (BANATNEWS)