Daghan ang naigo sa saag nga bala

CEBU, Philippines - Samtang mimenus ang gidaghanon sa mga nabiktima sa pabuto mas midaghan hinuon ang naigo sa saag nga bala atol sa pagsugat sa tuig 2012 kun itandi sa miaging tuig.

Nasagmuyo ang tagdumala sa Department of Health-7 nga si Dr. Susanna Madareita tungod sa pagsaka og 25 porsiyento sa mga nabiktima sa stray bullet gikan sa duha ngadto na sa walo ka biktima komparar sa 2011.

Si Madarieta nagkanayon nga nagmalampuson sila sa ilang kampanya sa Action Paputok Injuries Reduction (APIR) ug gani daghan ang nangayo og kopya sa ilang buhatan sa ‘Good bye paputok CD’ apan nalangay lang ang ilang pagpagawas niini.

Sa iyang bahin si Supt. Rex Derilo, hepe sa Firearms Explosives Agency Guards and Supervision Section -7 nga mopahigayon og imbestigasyon sa mga nabiktima sa stray bullet.

Si Sr. Supt. Melvin Ramon Buenafe, hepe sa Cebu City Police Office (CCPO) ug Chief Insp. Romeo Santander, hepe sa City Intelligence Branch (CIB) nga nahinabi sa mga tigbalita nagkanayon nga bisan paman sa mga nabiktima sa pabuto ug stray bullets malinawon gihapon ang kinatibuk-ang dakbayan.

Mao usab kini ang pangangkon ni Supt. Eduardo Saavedra, Deputy Provincial Director for Administration (DPDA) sa Cebu Provincial Police Office (CPPO) mibutyag nga tulo lang ka mga tawo ang nabuthan og pabuto samtang usa ang bala nga milapos sa atop sa balay ang ilang natala.

Sa report sa TVPatrol Central Visayas kagahapon, ang Department of Health pinaagi ni Dr. Expedito Medalla mibutyag nga mitaas og 6 porsiyento ang mga nabiktima sa saag nga bala.

Ang mga nabiktima sa pabuto sa dakbayan sa Sugbo ug lalawigan sa Cebu mikabat sa 53 ka tawo ug walo niini ang naigo sa mga saag nga bala. Itandi sa 2011, sobra og unom ka insidente ang natala sa saag nga bala sa tuig 2012 nga adunay walo ka tawong nangaangol. Samtang sa pabuto 49 ang natala sa 2011.

Matud pa ni Medalla mas daghan ang nabiktima karung tuiga sa stray bullet kompara sa miaging tuig.

Upat sa mga nabiktima sa pabuto naggikan sa Mandaue City Hospital diin duha kanila mga bata tungod sa rebentador.

Samtang ang hepe sa kapolisan sa Central Visayas Chief Supt. Marcelo Garbo mibutyag nga mopahigayon sila og imbestigasyon kun si kinsa ang responsable sa mga nabiktima sa stray bullets.

Pipila sa lugar nga adunay nabiktima sa saag nga bala mao ang lungsod sa Consolacion, Minglanilla, syudad sa Danao ug syudad sa Lapu-lapu ug gimando na ni Garbo sa mga hepe sa matag police stations sa maong lungsod ang paghimo og lawom nga imbestigasyon sa maong mga insidente. (BANATNEWS)