CEBU, Philippines - Napalgang patay ang usa ka lalaking gituohang sakop sa Alpha Kappa Rho fraternity nga giingong dakpunon apan gidudahang gi-salvage tungod sa daghang samad pinusilan sa kalawasan niini diha sa kasagbotan sa barangay Abucayan lungsod sa Balamban sa dayon nang udto niadtong Domingo.
Giila sa kapulisan ang biktima nga si Jupil Catayas, 21, nagpuyo sa maong lugar kinsa nakaangkon og samad pinusilan sa ulo, walang paa ug walang bahin sa iyang lawas.
Narekober sa kapulisan sa crime scene ang tulo ka empty shells sa .357 magnum revolver, duha ka slugs nga gituohang maoy gigamit nga armas sa wala pa mailhing kriminal ug laing nakuha mao ang gamay’ng botelya nga dunay sulod nga lana nga gituohang ‘habak’ sa biktima.
Si SPO3 Arvie Banate, chief investigator sa Balamban Police Station nagkanayon nga ila karung gisubay ang motibo nga posibleng panimawos sanglit ang biktima nalambigit na og daghang krimen sa naasoy’ng lungsod.
Matud ni Banate dunay standing warrant of arrest si Catayas sa kasong frustrated murder, murder ug homicide case.
“Sa murder wa pa siya malutsi og warrant unya ang homicide nga kaso wala siya makasuhi kay tungod sa financial nga rason sa complainant,” asoy pang Banate.
Nagduda ang kapulisan sa Balamban nga sobra sa duha ka tawo ang responsable sa pagpusil patay sa biktima ug karun duna na sila’y giimbitar nga mga tawo aron pangutan-on kung may kalambigitan sila sa krimen.
Dunay pipila ka mga tawong nakadungog og lanog nga buto atol sa pagsugat sa Bag-ong Tuig apan wala lang nila kini panumbalinga sa mga residente sa dapit sanglit nagtuo silang pabuto ra kini.
Ang pamilyang Catayas dunay mga tawong gi-presentar sa kapulisan sa pagdudang maoy responsable sa krimen. Wala pa usab matino ni Banate kung aktibong miyembro sa fraternity ang biktima.
“Ingon ani maglinabanay man gyud unta na sila pero ambot unsa iyang status,” matud pang Banate.
Siya midugang nga human nalutsan sa warrant of arrest sa frustrated murder si Catayas nagtagotago na kini.(/EIM) (BANATNEWS)