Baha problema sa Mandaue sa 2012

CEBU, Philippines - Nagpabilin nga nag-unang suliran nga sagubangon sa kagamhanan sa dakbayan sa Mandaue sa tuig 2012 ang problema sa mga pagbaha sa pipila ka mga barangay inigbundak sa kusog nga uwan.

Kini tungod kay hangtod karon wala pa masulbad ang maong suliran diin usa sa hinungdan niini mao ang kakuwang og imbornal nga kaagian sa tubig.

Ang mga sakop sa Accident Control Response Team (ACERT) kapolisan, kabomberohan, Emergency Rescue Unit Foundation (ERUF) ug uban pa maoy masugamak sa paglusad og rescue operation sa panahon nga moabot ang maong katalagman.

Ang mga barangay nga makasinati kanunay  og baha inigbundak sa kusog nga uwan mao ang Guizo, Subangdaku, Mantuyong, Banilad, Basak, Umapad, Opao, Paknaan, Ibabao Estancia, Alang-Alang, barangay Looc ug uban pa.

Samtang si Mayor Jonas Cortes nangompra na og rubber boat ug uban pa nga mga kahimanan alang sa search and rescue operation nga himoon sa ACERT sa panahon sa lunop.

Gibansaybansay usab niya ang mga pinili nga molupyo sa barangay nga apektado sa baha aron mahimong sakop sa Barangay Disaster Volunteer Brigade nga maoy motubag sa higayon nga mohugpa ang baha o kaha panahili sa yuta sa ilang lugar ug uban pang natural nga katalagman.

Gihingusgan ni Cortes ang pagpalimpiyo sa kasapaan ug mga kanal sa dakbayan aron may kaagian ang tubig paingon sa dagat ug dili na makalunop sa kabalayan.

Dugang makapabara sa tubig mao ang mga illegal nga estraktura nga gipanukod sa taliwala sa mga kanal busa molamwas ang tubig niini ngadto sa kabalayan.

Busa gimando ni Mayor Cortes ang pagpaguba sa maong mga kabalayan ilabi na ang mga nagpuyo sa tampi sa   Mahiga Creek sa barangay Subangdaku, Philcadan sa barangay Banilad, Butuanon Riverside sa barangay Maguikay ug uban pang suok sa dakbayan. (Romeo T. Limpangog/WC) (BANAT)