CEBU, Philippines - Ang mga suspetsado sa pagpanglugos sa mga menor de edad sa dakbayan sa Talisay kasagaran mga kadugo ra sa mga biktima kinsa mga hubog na sa bino, sumala ni Inspector Margienette Yosores sa Women and Children Protection Desk (WCPD) sa Talisay City Police Station.
Si Yosores nga nahinabi sa Banat News kagahapon nagkanayon nga sukad niadtong Enero hangtud sa Disyembre 2011 mikabat sa 11 ka mga kaso sa pagpanglugos ang na-report sa ilang buhatan.
Ang mga suspetsado napasakaan na og kaso ngadto sa korte apan pito ra kanila ang nasikop ug nagtingkagol karon sa city jail. Matud ni Yosores nga kasagaran sa mga suspetsado apohan, amahan ug uyoan sa mga biktima kinsa giingong nangalasbag na sa bino atol sa hitabo. Gibutyag usab ni Yosores nga kasagaran sa modus sa mga suspetsado hayloon og bisan unsa ang mga biktima sama sa kwarta ug uban pang mga materyal nga gumikan sa kalinghod sa hunahuna dali kaayong nahaylo.
Si Yosores mibutyag usab nga kasagaran sa mga pangidaron sa mga biktima nagsukad sa upat ka tuig ngadto sa 18-anyos.
Ang mga biktima kasagaran mga kabus ang kahimtang sa pagpuyo nga kasagaran nanginabuhi mao ra ang ilang inahan.
Ang mga suspetsado nakahigayon usab sa pagpanamastamas sa mga biktima sa panahong wala sa ilang balay ang mga inahan niini.
Gawas niini nahitala usab sa listahan sa WCPD nga sa tuig 2011 may 15 ka kasong pagpangabuso sa kababayen-an , diin 12 niini ang pagpamun-og ug pagpasakit sa lawas, ug 3 ang gibiyaan sa ilang bana ug wala na mohatag og sustento sa ilang mga anak.
Ang nahisgutang mga kaso napasaka na usab ngadto sa korte. Matud ni Yosores nga kasagaran sa hinungdan sa problema sa pamilya mao ang kalisud sa kahimtang sa pagpuyo kansang mga bana o kapuyo walay trabaho nga ikasuporta sa iyang pamilya nga maoy sinugdanan sa away sa magtiayon nga mosangpot sa pagpamun-og ug pangulata.
Ang laing hinungdan mao ang pangabubho diin ang bana o asawa magduda nga miduwa og laing team ang ilang kapikas.
Ang hepe sa WCPD nagkanayon nga usa sa ilang problema mao ang usahay kakuwang sa kooperasyon kanila sa mga biktima unya moatras pa sa ilang kiha tungod kay maluoy sa ilang mga bana.
Ang uban usab nga asawa manghangyo sa polis nga pabuhian na lang ang ilang bana ilabi na kun mao ra kini gisaligan sa panginabuhi sa ilang pamilya.
Apan matud ni Yosores sa milabay’ng mga tuig adunay bana nga katulo ka higayong nakombikto gumikan sa pagpangulata sa iyang asawa ug napriso sa Talisay City Jail. (Brenda D. Batuto/WC) (BANAT)