CEBU, Philippines - Laing kalbaryo ang gipaabot nga pas-anon sa publiko sa pagsulod sa Bag-ong Tuig kun maaprobahan ang gitinguha sa mga transport group nga mangayo og dugang umento sa pletihan sa pampublikong sakyanan.
Kini human subling gipadayag ni Ryan Yu, ang chairman sa City Transport Cooperative (Citrasco) dihang nahinabi sa Banat News nga ipadayun nila ang pagduso og petisyon alang sa dugang umento sa minimum nga pletihan karung bulana.
Tinguha sa Citrasco nga ang P7.50 nga minimum nga pletihan dugangan og laing 50 centavos aron mahimo nang P8 ang minimum nga pletihan. Kini bisan paman daghan nang mga drayber ang dili na manukli og 50 centavos kun pletihan og P8. Gani ang P10 nga pakuhaan og P7.50 suklian lang og P2.
Apan ang Citrasco nangangkon nga angayan pa ganing himuong 10 pesos ang minimum nga pletihan tungod sa way paghunong nga pagsaka sa presyo sa lana ug mga spare parts nga nakapaapiki og samot sa mga drayber nga halos wala nay masubra sa ilang tibuok adlaw nga pagpamasahero.
Si Yu una nang mibutyag niadtong naghinangat pa ang Pasko giuktaba lang una nila ang pagduso og petisyon tungod sa holiday season maong karong bulana nila kini ipadayon.
Kahinumdoman nga ang Citrasco dunay pending petisyon sa sayong bahin sa 2011 nga nangayo og dugang 50 centavos nga usbaw sa pletihan apan gihikling nila ang pag-insister niini human usab gilusad sa gobiyerno ang Pantawid Pasada cards isip subsidy sa gobiyerno ngadto sa mga drayber nga usa ka libo ka pesos nga diskwento sa gasolina. (Darrel A. Carumba/EIM) (BANAT)