Polis sa 2011 nagmatngon

CEBU, Philippines - Gamay ra ang mga polis nga nag-tubang og kasong administratiba karong tuiga itandi sa miaging tuig 2010 sumala pa sa Discipline Law and Order Section (Dilos) sa Police Regional Office-7.

Si Sr. Insp. Jose Gesto, hepe sa DILOS mitataw nga 66 lang ka mga kasong administratiba karung tuiga ang natala sa ilang buhatan itandi sa 79 sa miaging tuig sa tibuok Central Visayas.

Matud niya ang 79 ka mga kaso nahuman na samtang 18 ka kasong nahabilin karung tuiga nga nagpadayon ang ilang imbestigasyon.

“Mga bag-o naman ning nahabilin and we cannot resolve it immediately kay it takes three months before a single case to be resolved,” pasabot pa ni Gesto.

Siya midugang nga ang nahabiling 18 ka mga kaso posibleng mahuman na sa unang kwarter sa sunod tuig.

Ang Cebu Provincial Police Office (CPPO) nga adunay 29 ka mga kaso maoy dunay labing daghan og sakop nga gireklamo itandi sa ubang headquarters sa kapulisan dinhi sa rehiyon. Apan si Sr. Supt. Patrocinio Comendador, hepe sa CPPO nagkanayon nga sa kadaghang pulis nga iyang sakop dili gyud kalikayan nga dunay magpabadlong.

Midugang siya nga nagpasabot lang kini nga ang Provincial Investigation and Detective Management Branch (PIDMB) aktibo sa ilang trabaho pag-imbestigar niadtong mga pulis nga badlungon.

“Kusog among initiation sa filing of charges against our personnel if found liable of an offense,” sumala pa niya.

Siya mipasabot nga ang CPPO maoy labing lapad og lugar nga ginsakupan ug maoy dunay labing daghang polis sa tibuok rehiyon.

Si Gesta nagkanayon nga ang pagkunhod karun sa mga polis nga gireklamo nagpasabot kini nga ang kapulisan nagmatngon ug nasayod nga seryoso ang PNP pagsilot kanila kung sila magpabadlong.

 “At least aware na sila nga gitinuod na namo sila og investigate and charged,” matud ni Gesto.

Usa sa mga opisyal sa Regional Intelligence Division sa Police Regional Office-7 nga gitahasan sa pagsusi sa mga report ug impormasyon kabahin sa mga ‘binuang’ sa mga kaubang polis miangkong lisod alang kanila ang ilang trabaho apan gikinahanglan aron mapuo ang mga nagbuling-buling sa imahe sa organisasyon.

Sa katapusang kwarter adunay mga polis nga gipanglabay sa ubang lugar dinhi sa rehiyon tungod sa mga kalapasan ug wala pagsunod sa polisiyang gipatuman ni Chief Supt. Marcelo Garbo.

Duna say mga polis nga gilabay didto sa Mindanao tungod sa giingong kalambigitan nila sa operasyon sa mga drug syndicates dinhi sa Sugbu. (Rey B. Pasaporte/EIM) (BANAT)