Himsog nga kasayuran

Oaminal miawhag SB42 angay suportahan sa LGU

CEBU, Philippines - Si kanhi chairman Paul Clarence Oaminal sa Dangerous Drugs Board (DDB) mipadasig sa mga opisyal sa lokal nga kagamhanan sa Central Visayas   sa pagsuporta sa usa ka balaudnon nga magsingil og 80 porsiyentong buhis sa mga dagkong negosyo nga anaa sa ilang tagsatagsa ka lungsod ug siyudad kansang mga principal nga tag-iya tua magbase sa kaulohan.

Matud pa ni Oaminal nga ang maong balaudnon nga mao ang Senate Bill (SB) 42 nga gipangamahanan ni Senador Vicente Sotto III gitumong alang sa dakong kuwarta nga mahipos sa lokal nga kagamhanan pinaagi sa mga nasudnong negosyo kansang mga pabrika ug mga bodega anaa itarok sa ilang   lugar.

Atol sa tulomanon Headliners sa DYMR Radyo ng Bayan Cebu diin si Oaminal usa ka special guest sa miaging Biyernes sa buntag, iyang gipasabot nga giumol ug gipaila ni Sotto ang maong balaudnon karon sa senado aron usbon ang balaod kalabot sa paagi sa nasudnong kagamhanan sa pagsingil og dagkong buhis sa mga dagkong kompaniya kansang principal base of business tua magbase sa Metro Manila.

Unya ang mga pabrika ug mga bodega ug mga kahimanan sama sa mga trak de karga, delivery truck ug uban pa ania maglihok sa mga probinsiya apan makapasubo kay ang lokal nga kagamhanan diin kini mahimutang piskan lang og dyutay sa maong buhis.

Alang kang Oaminal nga sa maong sistema way laing mabuktot sa pag-atiman sa maong mga negosyo gawas sa lokal nga kagamhanan kansang mga karsada dali kaayong mangagusbat tungod sa mga dagko ug bug-at nga mga delivery truck ug uban pang mga kahimanan niini nga mobun-og sa lokal nga rekurso.

Sa aso ug hugaw sa ilang mga pabrika way laing mohanggap niini gawas sa   mga molupyo sa palibot nga gialagaran sa lokal nga kagamhanan ug sa laktod ang lokal nga kagamhanan maoy dako kaayo og malasakit niining mga kompaniyaha.

Busa alang kang Oaminal nga makatarunganon lang sa mga lokal nga kagamhanan nga mao unta ang may dakong pahat sa buhis nga bayran ning mga kompaniyaha.

Apan matud pa ni Oaminal nga nasuta ni Senador Sotto nga ang nabuhong sa buhis sa maong mga negosyante mao ra ang panudlanan sa nasudnong kagamhanan samtang pinisik nalang niini ang gibahin ngadto sa local government unit (LGU).

Alang kaniya gihatagan og pabor ning maong balaudnon ang kahimtang panudlanan sa panalapi sa lokal nga kagamhanan aron makatabang kaayo sa mga proyekto nga alang sa katawhan sa kahilitang mga lugar sa nasud. (Wen Celen) (BANAT)