Milugos sa anak anha mosugat sa 2012 sa prisohan

CEBU, Philippines - Anha na sugaton sa 46-anyos nga lalaki ang Bag-ong Tuig sulod sa bilanggoan human ang Talisay City Prosecutors Office wala morekomendar niini nga makapiyansa tungod sa paglugos niini sa 18-anyos nga anak nga bag-ohay pang nanganak niadtong Domingo (Disyembre 18).

Si City Prosecutor Benjo Luther Macion miingon nga wala na mopaubos sa preliminary investigation ang suspek aron unta iyang matubag ang pasangil nga gisang-at batok kaniya.

Sa reklamo sa 18-anyos, iyang gisaysay nga samtang diha siya sa ilang panimalay sa   nahisgutang adlaw gipahimuslan siya sa iyang amahan samtang siya nagpatutoy sa iyang anak nga babaye kalit nga misulod ang suspek ug mition kaniya og kutsilyo.

Gimandoan dayon siya niini sa pagbutang sa anak diha sa duyan ug sa kahadlok sa pagtion kaniya og kutsilyo misanong siya niini ug dihadiha giguyod siya niini ug gilugos samtang nagtion ang kutsilyo. Human niini misumbong siya sa iyaan nga miresulta sa pagpadakop sa suspek. (Lesley Caminade-Vestil/EIM) (BANAT)