Ex-con nanulis nadakpan

CEBU, Philippines - Usa ka gituohang ex-convict ang nasikop sa kapolisan human kini manulis og usa ka molupyo sa barangay Esperanza lungsod sa Aloguinsan pasado alas-3 sa miaging hapon.

Ang biktima nailhan nga si Maria Victoria de la Cerna, 51, molupyo sa maong lugar samtang ang suspetsado nailhan nga si Rey Villarta Rosales, 28, molupyo sa barangay Tabunok syudad sa Talisay.

Sa pakighinabi sa Banat News ni PO2 Eugene Taboada sa Aloguinsan Police Station, misaysay kini nga naglingkod ang biktima sa usa ka waiting shed dapit sa ilang panimalay dihang giduol sa suspek nga nagsakay og motorsiklo nga itom.

Sa kalit lang gidul-itan siya niini og armas sa iyang ulo ug mideklarar og tulis dayong kuha sa gold nga kwentas ug pitaka nga may kapin P6 mil nga kwarta.

Ang kapolisan human madawat ang reklamo daling mibutang og babag sa kadalanan sa barangay Poblacion hinungdan sa pagkasikop sa suspek kinsa nailhan tungod sa gisuot niini.

Nakuha sa kapolisan ang usa ka belt bag niini ang pitaka ug kwintas sa biktima, armas nga .357 nga adunay 6 ka buhing bala ug ang motorsiklo nga gituohang gi-tampered ang plaka niini.

Matud pa ni Taboada nga base sa gitug-an sa suspetsado gikan na siya sa prisohan kaniadto apan wala mobutyag kung unsay kaso niini apan nabantayan nga daghan kini og patik sa kalawasan. (Lesley Caminade-Vestil/EIM) (BANAT)