Kolektor gitulisa'g P13mil

CEBU, Philippines - Mikabat sa P13 mil ang salapi nga nasakiyo sa duha ka tulisang de motor nga mibiktima sa usa ka kolektor sa tindahan didto sa highway sa barangay San Isidro lungsod sa San Fernando niadtong Martes sa alas 6:20 sa gabii.

Ang biktima mao si Johnny Bajan, 33 , minyo nga kolektor sa Johnrey Techno. Industries Corporation nga nagbasi sa Tabunok siyudad sa Talisay.

Si PO2 Loreto Rama sa San Fernando Police mibutyag sa Banat News nga ang biktima naningil sa mga suki nila sa maong dapit dihang gibabagan siya sa usa ka motorsiklo nga gisakyan sa duha ka wala hiilhing tawo.

Unya ang angkas niini maoy mition kaniya og armas de fuego dayon gidala siya ngadto sa menteryohan sa maong dapit. Didto wala na makasukol ang biktima sa kabalaka nga patyon siya busa yano kaayong gisakmit   sa mga tulisan ang iyang bag nga gisudlan sa iyang koleksyong salapi nga mikabat sa P13 mil ug gidala usab ang iyang cell phone .

Diha-diha mibiya dayon sa maong lugar ang mga tulisan ug ang biktima nga ilang gibiyaan midangop dayon sa buhatan sa kapolisan sa maong lungsod. Gipangita pa karon sa kapolisan ang maong mga tulisan.