Alcover mibahad administrasyon iyang suklan

CEBU, Philippines - Mibahad si Anad Partylist Representative Pastor “Jun” Alcover nga lig-on niyang batokan ang gitawag niyang authoritarian administration ni Presidente Benigno Aquino III nga na-impluwensiyahan sa walhong pundok.

Si Alcover kinsa usa sa  wala mopirma sa impeachment complaint batok ni Chief Justice Renato Corona nagkanayon walay katungod ang pamuno nasud sa paghimo og mga kausaban sa judiciary.

Alang kang Alcover nga mas maayong ipunting   ni Presidente Aquino ang  iyang panahon sa paghimo og reporma sa executive department. Sa samang higayon gikondenar ni Alcover ang lakang sa administrasyon sa pagpasaka og kasong kidnapping batok ni Retired General Jovito Palparan gumikan sa pagkawagtang sa duha ka tinun-an sa University of the Philippines niadtong 2006.

Si Palparan   giingong mipadala na og surrender feeler alang sa malinawon niyang pagtahan ngadto sa mga otoridad.

Apan alang kang Alcover nga gigukod og tuyo sa administrasyon ni Aquino si Palparan gumikan sa maisugong pakigkombati niini sa mga New People’s Army (NPA) atol sa administrasyon ni kanhi Presidente Gloria Macapagal Arroyo.(/WC)  (BANATNEWS)