Pasahero gipatay sa drayber

CEBU, Philippines - Patay ang usa ka habalhabal drayber dihang gipusil sa wala mailhing tawo nga drayber sa motorsiklo nga giangkasan sa biktima niadtong Huwebes sa buntag diha sa sitio Kabulihan sa barangay Ilihan sa dakbayan sa Toledo.

Si SPO4 Gil Lastimosa, desk officer sa Toledo City Police Station nga gikahinabi sa Banat News miila sa biktima nga mao si Cesario Cepada, 37, nagpuyo sa barangay General Climaco sa naasoy’ng dakbayan.

Sa pasiunang imbestigasyon ni Insp. Bonifacio Lacerna ug mga kaubanan sa Toledo Police Station, ang biktima nag-angkas sa kolor maroon nga motorsiklo nga gimaneho sa wala mailhing lalaki.

Wala matino sa kapulisan kun diin gikan ang biktima ug ang mamumuno apan sa ilang pag-abot sa nahitaboan mihunong ang drayber ug mikanaog ang biktima aron mopalit og pan ug softdrinks sa usa ka tindahan sa maong dapit.

Apan dihang mibalik na ang biktima nga nagdala sa iyang pinalit nga snacks kalit lang mibunot og armas ang drayber sa motorsiklo ug gipusil makatulo ka higayon ang biktima sa dughan nga maoy nakaingon sa hinanali niining kamatayon.

Sigun sa asoy sa mga saksi human sa hitabo ang wala mailhing kriminal mipasutoy og padagan sa motorsklo paingon ngadto sa Sangi ug wala na maabti pa sa mirespondeng polis.

Nakuha sa kapulisan sa crime scene ang tulo ka kabhang sa kalibre .45 nga armas nga gituohang maoy gigamit sa suspek pagpusil ngadto sa biktima.

Matud ni Lastimosa ilaha pang gisubay karun unsay background sa biktima kay kanhi man habalhabal drayber ug posibleng dunay gikabangi nga laing tawo o kaha may kalambigitan sa panagbangi sa ginadiling drugas.

Gipalawman og maayo sa kapulisan ang ilang imbestigasyon aron matino ang anggulo kay hangtud ning pagsulat sa balita kagahapon sa hapon wala pa mailhi ang suspetsado.( /EIM) (BANATNEWS)