P150 mil nga pabuto gibasa

CEBU, Philippines - Gibanang-banang moabot gikan sa P100 mil ngadto sa P150 mil nga mga nangasakmit nga pabuto ang giunlod sa tubig kagahapon sa atubangan bahin sa buhatan sa City Market Authority.

Ang nahisgutang mga pabuto nasakmit sa milabay’ng semana gikan sa usa ka mall ug laing duha ka establisamento diha sa Carbon Market.

Nasayran nga ang pyrotechnics ra ang pwede nga ibaligya sulod sa malls ug dili puwede ang firecrackers.

Ang mga tag-iya sa mga gipangsakmit nga pabuto nakabayad og administrative fine nga P2,000 apan ang ilang mga produkto bas-on gihapon aron maseguro nga dili kini mabaligya.

Ang tanang firecrackers adto ra gitugotang mabaligya sa South Road Properties busa dakpon gyud sa siyudad ang masakpan nga mamaligya niini gawas sa SRP.

Sumala pa ni market administrator Racquel Arce nga duna siya’y mga tawo ang naniid karon sa nagkadaiyang establisamento busa awhag niya ngadto sa mga misupak sa balaod nga mohunong na lang gyud aron dili sila maalkanse.

Nagkanayon sa Arce nga hagbay ra nila nga gipaniiran ang nagkadaiyang estratehiya sa ubang negosyante nga magtago-tago sa pagpamaligya og pabuto busa dili gyud nila kini lung-an.

Kahinumduman nga gituyo sa siyudad nga sa SRP ra gyud puwede ang pagpamaligya sa pabuto aron maseguro nga luwas kini sa peligro. (/EIM) (BANATNEWS)