Nagluklok og shabu sa CPDRC tiklo
CEBU, Philippines - Nasikop sa kapolisan ang usa ka lalaki kinsa nasakpang nagluklok og shabu samtang miduaw sa iyang higalang napriso sa Cebu Provincial Detention and Rehabilitation Center (CPDRC) sa barangay Kalunasan niadtong Huwebes sa hapon.
Si Alvin Pitogo, 21, taga Barangay Yati, lungsod sa Liloan wala makaikyas dihang nahinolan ni SG2 Hermes Malubay, civil security officer sa Gate 1 ang usa ka paketeng shabu nga iyang gipalup-itan sa hawakan sa iyang short pants atol sa pag-inspection kaniya. Si Col. Cesar Veloso, Capitol Consultant on Security matter, mitug-an sa mga tigbalita nga si Pitogo mobisita unta sa napriso niyang higala nga si Dante Jalang, 35, nga taga Barangay Yati.
Si Jalang nadakpan sa kapulisan sa Liloan niadtong Lunes sa kasong illegal possession of illegal drugs.
Matud ni Veloso nga giangkon ni Pitogo nga ang dala niyang shabu iyang ihatag kang Jalang aron makasuyop kini og shabu sa iyang selda.
Si Alger Comendador, jail warden sa CPDRC nagkanayon nga ilang gi -turn over si Pitogo ngadto sa CPPO aron pasakaan dayon kini og kaso.
Midugang si Veloso nga ang pagkasikop kang Pitogo magsilbi kining warning sa uban nga mosuway sa pagpalusot og ginadiling drugas sulod sa bilanggoan.
(BANAT NEWS)
- Latest
- Trending
