Mga pabuto gibuhosan og tubig

CEBU, Philippines - Duha ka barel sa nagkalainlaing klase nga pabuto ug pyro-techniques nga nagkantidad og P30 mil nga nasakmit sa kapolisan sa dakbayan sa Talisay gibuhosan og tubig sa atubangan sa police station sa barangay Poblacion niadtong Martes sa buntag.

Si Supt. Eddie Recamara nga nahinabi sa Banat News mibutyag nga ang maong mga pabuto didto masakmit sa ilawom sa flyover sa Tabunok niadtong Disyembre 24, 2011 sa buntag.

Ang maong pabuto gibiyaan lang sa tindero kinsa mikaratel og dagan uban sa ubang mga vendor og pabuto dihang mironda ang kapolisan sa maong lugar.

Walay laing lugar sa dakbayan sa Talisay nga gitugotang kabaligyaan og mga pabuto gawas sa dakong hawan duol sa sports complex sa Poblacion.

Ang mga maninda og pabuto kinahanglang may pagtugot   gikan sa Firearms and Explosives, Security Agencies Guards Supervision Section (FESAGS) ug sa kagamhanan sa Talisay ug sa barangay Lagtang una pa sila makapamaligya sa maong produkto.

Niadtong 1990 ang ilawom sa flyover nasunog dihang miulbo ang usa ka hapag nga pabuto nga giladlad sa sidewalk sa maong lugar kay natagakan og upos sa sigarilyo.

Si Recamara midugang nga higpitan pa nila ang pag-monitor   sa mga pabuto ilabi na sa umaabot nga pagsaulog sa Bag-ong Tuig. (BANAT NEWS)