Ordinansa ni Ouano gitun-an

CEBU, Philippines - Dako ang higayon nga mapalabang ang ordinansa sa lalawigan sa Sugbo nga nagmando alang sa pag-umol og Provincial Disaster Risk Reduction and Management Council nga gipangamahanan ni Board Member Thadeo Ouano sa ika-unom nga distrito sa lalawigan sa Sugbo.

Kini ang gipadayag ni Bise Gobernador Agnes Magpale dihang nahinabi sa DYKC niadtong miaging adlaw kinsa miingon nga hayan nga sa sunod tuig sa ilang pagbalik sa regular session ilang hingpit nga kaaprobahan ang maong ordinansa.

Matud pa niya nga mahinungdanon kaayo ang pagpalabang sa maong ordinansa sanglit mahilakip na niini ang gahin nga salapi sa pasiugdahan nga mga programa nga maglambigit sa pagpangandam sa mahitabo nga katalagman.

Ang bise gobernador miingon nga sa kasamtangan maoy ilang gibasehan ang giluwatan nga executive order ni Gobernador Gwendolyn Garcia ug ingon man ang pagdeklarar usab og state of calamity sa mga dapit nga maigo sa katalagman nga maoy hinungdan nga matigayon usab ang pagluwat og hinabang gikan sa kagamhanan sa lalawigan.

Sa pagpakighinabi sa Banat News kang Board Member Ouano iyang gipasabot nga base sa balaod nga gipatuman sa nasud, ang mga lokal nga kagamhanan gimandoan sa pag-umol og ilang kaugalingong Disaster Risk Reduction Council sanglit pinaagi lamang niini kahatagan usab og kasulbaran ang panginahanglan og salapi sa mga higayon nga mahitabo ang katalagman.

Gitataw ni Board Member Ouano nga ang maumol sa konseho nga disaster and risk reduction council maoy pagatahasan sa paghimo og mga plano sa bahin sa angay buhaton sa mga molupyo sa higayon nga adunay moigo nga katalagman sa ilang lugar sama sa baha, landslide, sunog ug uban pang mugna sa kinaiyahan. (BANAT NEWS)