Suroy-suroy andam na

CEBU, Philippines - Gipangandaman na karon sa lalawigan sa Sugbo ang programang Suroy -Suroy Sugbo matag bulan sa Enero human sa Piyesta Senior.

Kini human makigtagbo sila si Governor Gwendolyn Garcia ug Vice Governor Agnes Magpale sa mga tourism officer sa mga kalungsoran sa habagatang bahin sa lalawigan sa Sugbo.

Atol sa maong tigum ilang natuki ang kalabot sa mga beach resort nga pagapuy-an sa mga turista, mga pasundayag nga idalit ngadto sa mga turista, mga Binisayang pagkaon nga isilbi ngadto sa mga langyaw’ng bisita ug uban pa.

Hinuon wala nay angayang kabalak-an ang pipila ka mga kalungsoran sanglit nasinati naman nila ang kalamposan sa bag-o pa lamang nga gipahigayong Southern Heritage Trail Suroy Suroy Sugbo.

Gitakda nga ipahigayon karong Enero 18-20 ang Suroy- Suroy Southern Heritage Trail nga langkoban sa mga kalungsoran ug dakbayan sa habagatang bahin sa lalawigan. (BANAT NEWS)