Nasunog nga mall ipaguba gyud

CEBU, Philippines - Mipagawas na og kamandoan ang Office of the Building Official (OBO) sa siyudad sa Sugbo ngadto sa mga tagdumala sa Gaisano Capital-South aron ipa-demolish ang nasunog nila nga building diha sa dalan Colon.

Ang OBO chief nga si Engr. Josefa Ylanan mipadala na og suwat ngadto kang Henry Gaisano II, ang tag-iya sa maong tindahan ug gisaysay niya nga peligro na kaayo ang kahimtang sa nasunog nga building ug angayan na kini nga gub-on.

Si Mayor Michael Rama mi-aprobar sa rekomendasyon ni Ylanan gumikan kay siya mismo nakakita sa estado sa building sa dihang gisuroy niya kini sa miaging adlaw.

Samtang nakaalerto usab karon ang City Traffic Operations Management sa pagbantay sa area aron dili makapaduol og maayo ang mga sakyanan tungod kay nangagabok na gyud og maayo ang pipila ka parte sa maong building.

Samtang ang staff sa engineering division sa Visayas Electric Company nga si Teodorico Tuñacao mipadayag kagahapon nga maglisod pa sila og balik sa kuryente sa mga sikbit nga building gumikan kay kinahanglang hawanan una ang atubangang bahin sa Gaisano Capital.

Hinuon nag-agad na lang sila sa mga tagdumala sa building kung kanus-a masugdan ang clearing operation niini, kahinumduman nga ang maong sunog moabot ngadto sa P20 milyones. (BANAT NEWS)